السي بنكيران هادشي خطير | فبراير.كوم | موقع مغربي إخباري شامل يتجدد على مدار الساعة

السي بنكيران هادشي خطير

  • مـــــريــــة   مــــكريـــم
  • كتب يوم الإثنين 06 فبراير 2012 م على الساعة 16:01

Larbi.org عمر الراضي صاحب مدونة

غادي نهضر معاك بالدارجة باش نتفاهمو… هاداك البلاغ ديال  التهديد والوعيد، نصيحة مني ما عمرك ما تعاود تدير شي واحد آخر بحالوو. خلي عليك هاديك الأساليب البوليسية راه الناس ما بقاوش كيقفقفو حيت فلان دار فيها سبع وارسل ليهم تهديد عبر لاماب. راه مشا هداك الوقت اسي رئيس الحكومة.   ثم نصيحة لله : قبل ما تدير فيها جدارمي هز هداك تليفون أو عيط علا صحابك يعاودو ليك اش واقع في لبلاد. نتا بان ليا ما في راسك خبار في هاذ الدنيا. مثلاً عبد العالي حامي الدين ، اللي هو ديالكم، يقول ما يلي ؛ « قام عناصر السيمي بشكلٍ غير قانوني بإقتحام المنازل بدعوى القبض على متورطين … وجرى إستنادا على ذلك إعتقال بعض الأفراد الذين لا علاقة لهم بالأحداث، وهو ما أدى إلى تأجيج مشاعر الغضب لدى الساكنة التي ثارت ضد السلطة ». وقول لشي شاوش ديالك يمشي يشري ليك أخبار اليوم باش تاكد من هاد التصريح. وباش تكون منطقي معا راسك خاصك تتابع سي  عبد العالي حامي الدين أمام القضاء بتهمة « اختلاق أحداث أو تضخيمها أو تقديم أخبار زائفة أو ملفقة » كيف قال البلاغ البوليسي ديالك. ونفرض أنه ما عندكش معا عبد العالي حامي الدين، ماشي موشكيل كاين واحد سيد آخر يعاود ليك خبار الدنيا. هاد السيد سميتو جمال المسعودي وهو نائب برلماني ديال واحد الحزب سميتو « العدالة والتنمية » (ديال المغرب ماشي ديال تركيا).  « أكد جمال المسعودي بأنه  يفاجا في كل مرة يقتنع فيها السكان بالحوار والهدنة بمشكل جديد يزيد من تاجيج الوضع ويعيد حالة التوتر … يقول المسعودي في إشارةٍ إلى حادث إعتقال شابين من أبناء الحي يوم الخميس الماضي ما دفع السكان إلى الخروج إحتجاجاً على الأمر خصوصاً أنا الشابين حسب تصريحات مصادر متعددة،لم يقوما ما يستوجب توقيفهما بل أن المسعودي شهد بنفسه أن أحد  أولئك المعتقلين كان يقود الحوار بين الساكنة ولجنة البرلمانيين  »  ونفرض أنه حتى هاد السيد ديالكم خصو يتحاكم بتهمة « اختلاق أحداث أو تضخيمها أو تقديم أخبار زائفة أو ملفقة » كيف قال البلاغ البوليسي ديالك. نزيدوك شريف آخر من الحزب ديالك وخى بان ليا راه راسك قاسح شوية. السيد سميتو خالد البوقرعي وحتا هو  نائب  برلماني عن حزب العدالة والتنمية (ديال المغرب ماشي ديال تركيا).  يقول  خالد البوقرعي “أؤكد حسب ما عاينت في مجموعة من المنازل، وفي تواصلي مع المواطنين أن عددا من البيوت في حي الكوشة تعرضت للاقتحام، من طرف قوات الأمن ورأيت بيوتا كسرت نوافذها وأبوابها ».   ويمكن أن استمر في سرد شهادات أشخاص من حزبك حول تجاوزات الأمن وعسكرة المدينة وقمع السكان ولكن كي بان ليا كن نكب (كمن يصب الماء فوق الرمال)الماء في رملة. يمكن ندير ليك جوج أولى تلاتة فيديو حول قمع السكان في تازة، ولكن تفكرت أنك ما عندكش مع الانترنت أو ما كتفهم فيه والو . هذا الجهد ما عرفتش من نشدك.  أما بعد دابا نجيو للغة التهديد والوعيد اللي استعملتها في البلاغ البوليسي ديالك.  أولاً نصيحة لله ملي تكون عندك شي أزمة خصك تبت كواريك او تعطي المتل ماشي تزيد فيه حتا نتا أو تدير فيها سبع « أن غادي نوريكم علاش قاد ». وش نتا رئيس حكومة أو لا شاف ديال لبوليس؟ كان حريا بك أن تساهم في تهدئة الأوضاع عوض إستعراض العضلات. تانياً واش مسالي ماعندك ما يتدار ؟ ملي بديتي أو حنا كنسمعو عليك غير في بلاغات منع الصحف وتهديد المواقع. هاد شي لي حادق فيه اسات؟ ما عندك أزمة خصك تحلها، ما عندك قانون مالية خاصك تصوبو … مسالي غير لكتابة البلاغات؟  كلشي درتيه دابا بقى ليك غير التهديد والوعيد؟ تالتاً: خلينا نحترموك شوية راك قاد الوليد : شفتي الطريقة باش تكتب بها البلاغ ديالك راه كى تسمى زعامات . واش قالوا ليك راه حنا تلاميد في المدرسة أو نتا المدير  لبغي يجبد للبراهش الودنين ديالهم؟  اش هداك الاسلوب ؟ باغي تخلع البشر زعما؟ هديك  الهدرة ديال « ندي بوكم المحكمة  » راه ما بقاتش كى تصدق … وسي بنكيران راه مشى زمان الخوف وفيق معانا شوية . … هدو جوج كلمات لبغيت نقول ليك … كيقول المتل ديال المدرسة الابتداية « إحترم … تحترم » أو نتا مازال مسخنتي بلاستك أو بديتي بأسلوب التهديد والوعيد. ولعلك تفهم أن هاد الأسلوب ما بقاش خدام أو ما عمرك تعاود تكتب شي بلاغ بوليسي بحال هداك ديال 5 فبراير.  

أكتب تعليقك

مواضيع ذات صلة